Saturday, March 29, 2014

@ 5:21 PM எழுதியவர்: வரவனையான் 1 மறுமொழிகள்












சார்லியின் லூனா மொபட்டில் கடற்கரையும் சார்லியும் நகரத்தை

நோக்கி போய்க்கொண்டிருந்தனர். பசி வயிற்றைக் கிள்ளியது. ”8 மணிக்கே

வெயில் கொலை வெறியாய் அடிக்குது. இன்னைக்கு பொழுதுக்கும்

அடிக்கிற வெயிலு இப்பவே அடிச்சு முடிப்பது போல அடிக்குது”

என்றார்.



ஆமாங்க சாமி ! என்று சார்லியும் ஒத்துக்கொள்ள இனி இவனிடம்

அமொதிக்கிற மாதிரி எதுவும் கேக்கக்கூடாது, எத சொன்னாலும்

வில்லுப்பாட்டுல துணையாளு மாதிரி ‘ஆமடி தங்கம்’ போடுவான்

என்று நினைத்தார். பிடிக்கும் என்றாலும் இப்போதைக்கு அவர் இருக்கும்

மனநிலையில் இது போன்ற ஜால்ரா சத்தத்தை விரும்பவில்லை. அவரின்

மனசெல்லாம் பெரியாம்பிளை ஏட்டய்யா ஏன் இப்படி செஞ்சாருன்னு

தெரியவரணும். அவருலாம் டூட்டியில இல்லாம போறது இந்த பகுதி

போலிசுக்குத்தான் சிரமம். களவு போன இடத்தை பாத்தோன்னே

சொல்லுவாரு “அய்யா பாத்தீங்களா அந்த கணக்கன்பட்டியான் பெயிலில்

வந்துட்டான் போல”ன்னு . எவன் எவன் எப்படி திருடுவான்னு

அத்தனையும் அவருக்கு அத்துப்படி. ஒரு தடவ இண்டர்-செக்கிங்

வந்த ஆங்கிலோ இந்திய டிஎஸ்பி இவரு திறமையை பாத்து என்

கூட மெட்ராஸ் வந்திடுய்யான்னு கூப்பிட்டாரு “இல்லைங்கய்யா என்

திறமையெல்லாம் இந்த பக்கத்து தெல்லவாரி நாய்ககிட்ட தான்ய்யா

வேலையாகும்” என்று மறுத்து விட்டவர்.


ஒம்போது ஒம்போதறைக்குல்லாம் போஸ்ட்மார்டம் ரிப்போர்ட்

கொடுத்துருவாய்ங்க. நாம நேத்து அங்கின இருந்தாவாது எதாவது

சொல்லி காப்பாத்தி கொடுத்திருக்கலாம். சரி முதல்ல வீட்டில போய்

குளிச்சிட்டு பெரியாஸ்பத்திரிக்கு ஓடலாம்ன்னு முடிவு செய்தார்.

வண்டிதான் அவரோட மனசு வேகத்துக்கு ஒத்துழைக்கவில்லை.

ரோட்டின் ஓரத்தில் பனம்பழங்கள் கொத்தோடு சீந்துவாரற்று கிடந்தன.

தெக்கத்தி பக்கம் மாதிரி இங்கிட்டு பனம்பழத்தையெல்லாம் சாப்பிட

மாட்டேங்கிறாங்க. தூத்துக்குடி வள்ளியூரு செந்தூர் பக்கமெல்லாம்

இதை வச்சு இனிப்பே செய்வாங்க. இவனுங்க பாலையை சீவி கள்ளு

வடிச்சு குடிச்சிட்டு குப்புறபடுக்கத்தான் லாயக்கு.



சீந்துவாரற்று கிடந்த பனம்பழங்களை பார்த்ததும் “செருப்பு

தெருவில் கிடப்பதும், சிறுக்கி சந்தில் திரிவதும் குத்துவாரற்று

குத்துவாரற்று” நேற்று இரவு ரயில் கழிப்பறையில் எழுதியிருந்த

வாசகம் நினைவுக்கு வந்து சிரிப்பு வந்தது . செருப்புக்கும் குத்துவார்

இல்லாட்டி போடமுடியாது, சிறுக்கிக்கும் குத்துவார் இல்லாட்டி

பொழப்போடாதுன்னு சொல்றான். கக்கூசு கக்கூசுக்கு இதுவே

வேலையா திரியுறாய்ங்க கிறுக்குப்பயலுக. அன்னைக்கு அப்படித்தான்

காசு கொடுத்து பேல்ற கக்கூசுல அந்த பக்கம் ஆம்பிளைக வரிசையில

கடைசி கக்கூசுல இருந்து இந்த பக்கம் பொம்பளைக கக்கூசுக்கு

வந்த தண்ணி பைப்ப சுத்தி ஆணியை வச்சு ஓட்டைய பெரிசு பண்ணி

பாத்திருக்கான் ஒருத்தன். அவனை புடிச்சாந்தாய்ங்க. ஏண்டா கால் இஞ்ச்

ஓட்டை வழியா மசுருகூட தெரியாதே எதுக்குடா இந்த வேலைன்னு

சூத்துலேயே மிதிச்சா “அய்யா பீடி வாசனை வந்ததுங்கய்யா,

என்னான்னு பாக்கனும்ன்னு ஆவலாயிடுச்சு:ங்கிறான். ஒரே நாள்

எப்படிடா அவ்வளவு நீள சொவத்துல ஓட்டை போட்டேன்னு கேட்டா 40-

50 நாளா டெய்லி கொஞ்சம் கொஞ்சமா நோண்டினேன்னான்.


பத்து காசு கக்கூசு அது . காசு கொடுத்து போறதுன்னாலும்

ஒரு அளவு இருக்கில்லையா போனவன் அரை மணி நேரமா

காணாமேன்னு கூப்பிட்டு பாத்திருக்கான். தட்டியும் பாத்திருக்கான்,வேற

வழியில்லாம கதவுல எட்டி பாக்கும்போது அய்யா ஆயிரத்தில் ஒருவன்

நம்பியாரு குழாய் பைனாக்குலரில பாக்குறது போல பொம்பளைக

கக்கூசை பாத்த்திட்டு இருந்துருக்கான். அங்ககே பொடனில நாலு

போட்டு வெரட்டி விடவேண்டிதானே பெரிய மனோகர சிவாஜிய

புடிச்சாரா மாதிரி இந்த வெண்ணைக்கு நாலைஞ்சு பேரு. போங்கடா

பொழப்பத்தவய்களான்னு விரட்டியதும் நினைவுக்கு வந்தது.



”யோவ் நேரு, இவனை பி.எஸ்.ஆர் சர்ச் பண்ணி அண்ணாகயித்த

அத்து ஒக்கார வையி.. இவன் பேருல என்ன சுதந்திர போரட்ட

கேஸா போடமுடியும், தண்ணிய போட்டு அநாகரீகமா பேசுனான்னு

நியூசென்ஸ் கேஸை போட்டு கோர்ட்டுக்கு அனுப்பிவுடு”



”காசு வச்சிருக்கியாடா முன்சீப் அய்யா 20 – 30 ரூவா அவரு மூடை

பொறுத்து பைன் போடுவாருன்னு” கேட்டபடியே கான்ஸ்டபிள் நேரு

அவனது சட்டை டவுசர் பைகளை ஆராய்ந்து கொண்டிருந்தார்.


அய்யா இவன்கிட்ட இதாங்கய்யா இருக்குது என்று கைவிரித்து

காட்டினார் நேரு. 20 காசு ஐந்தும் 10 காசு ஐந்தும் மூன்று

வாரயிதழ்களில் கிழிக்கப்பட்ட தாள்களும் இருந்தன.


ஒரு தாளில் ”யோக்” பாடி பிரா விளம்பரம். ஒரு பெண் பாடியுடன்

நின்றிருந்தாள். மற்றொன்றில் இரட்டை ஜடை போட்ட ஒரு பெண்

ஊஞ்சலாடும் தொடர்கதை ஒன்றின் ஓவியம். இன்னொன்றில்

ஒய்.கே.சரோஜா என்கிற நடிகை அம்மனாக நடித்த படத்தின் ஸ்டில்

இருந்தது. ’ ரெண்டு ரூவா அம்பது காசுதான் இருக்கு, ரீமாண்ட்தாண்டி,

நீ போயி ஜெயிலில் களி தின்னுகிட்டே கக்கூசில ஓட்டை போட்டு

ஒண்ணுக்கடிக்கிறத சீன் பாத்த கதையை சொல்லு’ என்றபடியே இந்த

படத்தயெல்லாம் எதுக்குடா வச்சிருக்கிற என்றார்.


 இல்லங்ய்யா எப்பையாவது எடுத்து பாத்துகுவேய்ங்க என்றான். “

அய்யா, இவனை விசாரிட்டேன், பஸ்ஸ்டாண்ட சுத்தியிருக்கிற தெருவோர

ஓட்டலில எல்லாம் ராத்திரி பாத்திரம் வெளக்கி கொடுக்குறானாம், இவன்

பட்ட பெயரு கைமூட்டி கந்தசாமியாம்”



ஓகோ அப்ப இந்த படமெல்லாம் அய்யா அப்பகைப்ப ’கரவேல் போற்றி’

பாடத்தானா, பாடி பிரா வெளம்பரம் சரி , இது எதுக்குடா பொண்ணு

ஊஞ்சலாடுறது. அத பாத்து என்னாவப்போவுது.


இல்லங்கய்யா ஒருதடவ சொந்தகார பொண்ண ஊஞ்சலாட்டிகிட்டு

இருந்தேன், அப்பத்தான் மொத மொத விசுக்குன்னு காத்துல பாவாடை

தூக்கனப்ப பாத்துபுட்டேன். அதனால தப்பான வேலை செய்யும்போது

ஞாபகம் வர்றதுக்காக இந்த படம் வச்சிருக்கென்.


குபுக்கென்று சிரிப்பு வந்தது. இது போன்ற அனுபவம் கடற்கரைக்கும்

ஒரு ஓடையொன்றில் ஏற்பட்டிருக்கிறது. குளித்து விட்டு எழுந்த ஒன்று

விட்ட அக்கா கையிலிருந்து விழப்போன துவைத்த துணியை பிடிக்கும்

முயற்சியில் வாயில் கவ்வியிருந்த பாவாடையை விட்டுவிட ஈர

உடம்பில் வெயில்பட்டு தகதகக்கும் பெண்ணின் மேனிதான் தெரிந்தது

உறவு முறையெல்லாம் மூளைக்கு எட்டவில்லை.


அதென்னாடா மூணாவதா சாமி படம், செய்யறதை செஞ்சிட்டு தலைய

செரச்சிட்டா போதுங்கிற மாதிரி மன்னிப்பு கேக்கவா என்றார் கடற்கரை.

'இல்லைங்க இந்த படம் ஒரு நாளைக்குன்னா அது ஒரு நாளைக்கு "

என்று கைமூட்டி கந்தசாமி சொல்லிக்கொண்டிரும்போதே நேரு போலீஸ்

லத்தியால் அவனின் முதுகில் அடிக்க ஆரம்பித்தார்.


” ஏண்டா கை அடிக்கிறதே தப்பு இதுல அம்மன் வேஷத்தில இருக்கிற

பொம்பிளை படத்த பாத்து வேற அடிப்பியான்னு” சுத்தி சுத்தி வந்து

அடித்துக்கொண்டிருந்தார்.


தனக்கு கீழ் வேலை பார்க்கும் போலீசார் விசாரணையின் போது

அடித்தால் கடற்கரை தடுப்பதில்லை. தடுத்தால் பின்னர் வேறு

விசாரனைகளின் போது ஒத்துழைக்கமாட்டார்கள். கடற்கரை

விசாரித்துக்கொண்டிருக்கையில் கைக்கடிகாரத்தை மேலேற்றினால்

பக்கத்தில் நிற்கும் போலீசார் அடிக்க வேண்டும் என்பது அந்த

கச்சேரியில் விதி. அது போல அவருக்கு கீழான போலீஸ்

அடித்துக்கொண்டிருக்கும் போது தடுக்ககூடாதென்பதும்

எழுதப்படாத விதி. தடுத்தால் இன்ஸ்பெக்டர் அய்யா நல்லவரு அந்த

போலீசுகாரன்தான் அடிச்சுகிட்டே இருந்தான் என்று பேச்சு கிளம்பும்.  ரொம்ப

ஓவராக போகும் போது மட்டும் ,  செத்துற போறாய்ன்யா என்பதான் கோர்ட்

வேர்ட், அப்பவும் அடி உடனே நிக்காது கொஞ்சம் கொஞ்சமாகத்தான்

குறையும்.


நேரு போலீஸ் சாமியாடி, அந்தாளு குலதெய்வம் கோயிலுல இவருதான்

பூசாரி வேற. மாசி செவன் ராத்திரிக்கு 21 நாளைக்கு முன்னாடி

இருந்தே கையில கங்கணம் மாலைன்னு ஸ்டேசனையும் சாமியார்

மடம் மாதிரி ஆக்கிருவாங்க. கூட தொணைக்கு பெரியாம்பிளையும்

சேர்ந்துகுவாப்ல. அந்தாளும் நேரு போலீசும் சாமி கும்புடற வகையில

மாமன் மச்சினைங்க. இதுல பெரியாம்பிளை பொண்டாட்டி பக்கம் பெரிய

கூட்டம் செய்முறை செஞ்சே தாலியந்து கெடக்குறாப்ல.


சின்ன போலீசு அடிக்கிறதை நிப்பாட்ட ஒரே வழி யோவ் அங்கிட்டு

கூட்டிட்டு போய் விசாரிங்கய்யான்னு சொல்லுறதுதான். அதுதான்

சிக்னலு. ஆனாலும் அவன் அந்த அம்மன் வேஷம் போட்ட நடிகையோட

படத்தையும் பாடி பிரா வெளம்பர மாதிரிதான்னு அந்த நேரத்தில

பயன்படுத்துறேன்னு சொன்னது கடற்கரைக்கு வியப்புத்தான் வந்தது.


இருக்காதா பின்ன பஸ் ஸ்டாண்டில பாத்திரம் வெளக்குற வெம்போடுக்கும்

டிகிரி முடிச்சி வேலைக்கு சேர்ந்து எஸ்.ஐயிலிருந்து இன்ஸ்பெக்டரான

தனக்கும் ஒரே ரசனை .இதை எந்த வகையில் சேர்ப்பது.


அன்னைக்கு ஒரு நாள் வடக்கே இருந்து மத்திய அமைச்சரும் அவரு

பொண்டாட்டியும் கொடைக்கானலுக்கு வந்து காஷ்மீரத்து சிங்கம்

வீட்டுச்சிறையாக அடைக்கப்பட்டிருந்த கோஹினூர் மாளிகையில்

தங்கி விட்டு டிரெய்ன் ஏற கொடைரோடு ரயில்வே ஸ்டேசனுக்கு

வர இருந்தனர். பந்தோபஸ்துக்காக திடீரென்று கடற்கரையை போக

சொல்லி மைக் ஒன்னிலிருந்து வயர்லெஸ்ஸில் தகவல். மைக்

ஒன் என்பது பெரியய்யா ஆபிஸு வயர்லெஸ். மைக் டூ என்பது

பெரிய்யாவொட வயர்லெஸ். போதையில சகதியில பொரள்ற

எருமையாட்டம் பொரண்டுகிட்டு இருந்தாலும் எந்த போலீஸ்காரனுக்கு

“மைக் ஒன் காலிங் “ என்றோ மைக் டூ காலிங் என்றோ வயர்லெஸின்

குரல் கேட்டால். சட்டுனு பூராப்போதையும் வடிஞ்சிடும். விவிஐபி

விசிட்டுக்குலாம் இப்படித்தான் திடீர்ன்னுதான் பந்தோபஸ்த் டுயூட்டி

போடுவாங்க. முன்னக்கூடி சொன்னா எதும் சதி செயலுக்கு துணை

போயிருவாங்கன்னு இந்த ஏற்பாடு. ஆனா ஸ்பாட்டுக்கு எஸ்.பி

இன்ஸ்பெக்டர், ( எஸ்.பி இன்ஸ்பெக்டர் என்பவர் எஸ்.பிக்கு மட்டும் பதில்

சொல்லும் கடமைப்பட்டவர் )  ரிசர்வ் போலீசுலாம் மொதல்லவே

போயிருவாங்க.

பெரியய்யாவுக்கு நம்பிக்கையான ஆளுதான் எஸ்.பி இன்ஸ்பெகடராக

இருப்பாங்க.

கடற்கரையை பந்தோபஸ்துக்கு போக சொல்லி வயர்லெஸ் தகவல்

வந்த அடுத்த நிமிசமே விஐபி எஸ்கார்ட் வண்டியில இருந்து

வயர்லெஸ் தகவல் வந்தது “வத்தலகுண்டு பாஸிங் ஓவர்” என்று.

ஏன்யா சின்னாளப்பட்டி ஸ்டேசன் இன்ஸ்பெகடர் என்ன வயசுக்கு

வந்திட்டானாமா, அவன் ஸ்டேசனிலிருந்து கொடைரோடு பத்து கிலோ

மீட்டருதானே, இங்கிருந்து 25 கிலோமீட்டரு இப்பவே வத்தலகுண்டு

தாண்டிட்டாய்ங்களாம், நம்ம உசிரத்தான்யா வாங்குறாய்ங்க என்ரு

டிரைவரிடம் அலுத்துக்கொண்டே ஜீப்பில் ஏறினார்.

கொடைரோடு ரயில்வே ஸ்டேசன் போனா பெரிய கூட்டமெல்லாம்

ஒன்ணுமில்லை. பெருசுகளா நாப்பது அம்பது பேரு இருந்தாங்க தாமிர

பட்டயத்துக்கு மனுக்கொடுக்க நின்னுகிட்டு இருந்தாங்க. மந்திரி

ரயிலுக்கு 2 நிமிசம் முன்னாடிதான் வந்தார். மந்திரி அஞ்சு அஞ்சரை

அடி இருப்பாரு, அவரு பொண்டாட்டி 6 அடிக்கு மேல இருக்கும்

கடற்கரைய விட உயரம்.

டிரையினில் ஏத்திவிட்ட பிறகு பென்சன் கேட்டு மனுக்குடுக்க வந்திருந்த

தியாகி ஒருத்தர் “ மினிஸ்டர் பொண்டாட்டி நல்ல கெடா சிறுக்கியா

இருக்கா, இவளை கட்டி மேய்க்கலாம் நமக்கு சத்து பத்தாதுப்பா, குண்டிய பாரு நல்ல பிரியாணி தேக்சாவாட்டம்  ” என்று

சொல்லிட்டே போனத கேட்டு ஆச்சரியமா ஆகிப்போனது. கிழடு

தட்டி தடுமாறி நடந்து போகும் தியாகி நினைத்ததைதான் நல்ல

ஓங்குதாங்கான ஆளான கடற்கரையும் நினைத்தார். பிடித்த பென்ணிடம்

ஒரு நிமிடம் மனதுக்குள் வாழ்ந்துவிடும் கெட்டபழக்கம் கடற்கரைக்கு

இருந்தது. அன்று தன்னை போன்ற மற்றொருவரை கண்டார்.


சரி சரி ! நீ எந்த ஊருடா’ என்று கைமூட்டி கந்தசாமியிடம் கேட்டார்.

படுகளம் அய்யா என்றான்.

ஊராளியா ?

ஆமாங்கய்யா…

 சரி இனிமே இங்கதான் இருக்கனும். தெனமும் ஸ்டேசனை கூட்டி

பெருக்கி வெள்ளிக்கிழமையாச்சுன்னா கழுவியுடனும் . போலீசார் டீ கீ

வாங்கியாரச் சொன்னா வாங்கியாந்து துணைக்கு இருக்கனும். சம்பளம்

தர சொல்லுறேன். யோவ் ஊட மாட வேலைக்கு வச்சுக்கங்க என்று

நேருவிடம் கந்தசாமியை கூட்டிட்டு போக சொன்னார். கந்தசாமியை

கடவுளை நினைத்து கையடிப்பவனாடா நீ என்று கொலைவெறியுடன்

முறைத்தவாறே அழைத்து போனார் நேரு போலீஸ்.


நடந்து போனாவனின் நடையை பார்த்து “டேய் இங்க வா ! அது

என்னாடா நெளிஞ்சுகிட்டே நடந்து போற “ன்னாரு

ரயிலிலே இருந்து கிழ விழுந்து இடுப்பில அடிவுழுந்து இப்படியாகி

போச்சுங்கய்யா என்றான்.

’சரி போங்கள் நெளிசல்’ என்றார் கிண்டலாக. இப்படித்தான் கைமூட்டி

கந்தசாமியின் நாமகரணம் நெளிசல் என்று மாறியது.


நிறுத்து நிறுத்து என்றார் சார்லியிடம். யாகப்பன்பட்டி போஸ்டாபீஸ்

வாசலில் இறங்கி உள்ளே போனார். போஸ்டாபீஸும் அதுதான் மாஸ்டர்

வீடும் அதுதான். சார்லி சத்தம் கொடுக்க மாஸ்டர் உள்ள இருந்தவாறே

எகத்தாளமாக என்ன என்று கேட்க இன்ஸுபெக்டர் அய்யா வந்திருக்காக

என்று கத்தினான். போஸ்டல் துறையிலும் இன்ஸ்பெக்டர் உண்டு

என்பதால் தடால்புடால் என ஓடி வந்தார் மாஸ்டர். வந்து கடற்கரையை

பார்த்து நிம்மதியானவர். சார் வாங்க, வாங்க என்று நாற்காலியை தானே

போய் தூக்கிவந்து துண்டால் தட்டி உட்காரச்சொன்னார்.


ஒரு போன் பண்ணனும் என்று கடற்கரை சொல்லவும் இடுப்பிலிருந்த

சாவியை எடுத்து போஸ்டாபிஸை திறந்தார். வீட்டுக்குள் போயும்

போகலாம். சார்லியை பார்த்தவுடன் இந்த வழியை திறக்கிறார் என்று

கண்டுகொண்டார்.


வீட்டு டெலிபோன் எண் 123 என்று இருந்தது ஒரு சௌகரியம்

மறக்கமாட்டோம். பழைய எண் 23 என்று இருந்தது. இதுதான் சுலபம்

ஒன்னு ரெண்டு மூணு சொல்லிகிட்டே டயல் செய்தார்.


மகனிடம் விபரங்கள் கேட்டுவிட்டு பெரியாஸ்பத்திரி நம்பர் கேட்டு

வாங்கி அங்கு டயல் செய்தார். பி.எம் ரிப்போர்ட் பெரிய டாக்டர்

கையெழுத்துக்காக வச்சிருக்கு, அவரு காலையிலதான் வருவாரு.

இன்னைக்கு மதுரை பெரியாஸ்பத்திரில ஆப்பரேஷனாம் அங்க

போயிருக்காரு என்று தகவல் கிடைத்தது.


அப்பாடா என்று இருந்தது. கொஞ்சம் நிம்மதி .


ரெண்டு ரூபா ஆச்சுங்க, ஆனா வேணாம் என்றார் போஸ்ட் மாஸ்டர்

ஏன்யா நோணாம் கஞ்சா கிஞ்சா விக்கிறீயா என்றார் பேண்டில்

தூளாவிக்கொண்டே.


இரண்டு ஒரு ரூபாய் எடுத்து சார்லி கையில் கொடுத்து மாஸ்டர்

கையில கொடுய்யா என்றபடி வெளியே வந்தார்.

பின்னாடியே வந்த சார்லியிடம், இங்க எங்கன சாராயம் விக்கிறாய்ங்க

என்றார்.


அய்யா… ஊருக்கு வெளிய விக்கிறாய்ங்கய்யா


வாய் மாத்த என்ன வைச்சுருக்காங்க


மொளகா வத்த கொழம்பும் அவிச்ச வாத்துமுட்டையுங்கய்யா


சரி போஸ்ட் மாஸ்டர் வீட்டில ஒரு சொம்பு வாங்கிட்டு போயி நான்

கேட்டேன்னு சொம்பு நிறைய சாராயம் வாங்கிக்க, ஏய்ம் பேர சொல்லி

நீயும் சாப்பிட்டுக்கா ரெண்டு முட்டையை அறுத்து மொளகா குழம்பு

ஊத்தி வாங்கிட்டு வா !

( தொடரும் )

Friday, March 28, 2014

@ 4:44 PM எழுதியவர்: வரவனையான் 1 மறுமொழிகள்




வெள்ளோடு ரயில்வே ஸ்டேசனில் மீதமாகி போன தண்டவாளத்தின் நடுவே வரும் மர ரீப்பர் கட்டையால் செய்யபட்டிருந்த பெஞ்சில் அந்த காலை வேளையிலேயே புறமண்டையில் சுள்ளென்று அடிக்கும் வசந்தகால வெயிலில் அமர்ந்திருந்தார் கடற்கரை.

பாண்டியன் வெள்ளோட்டில் எப்போதும் நிற்காது. அன்று எதோ சிக்னல் கிடைக்காமல் வேகத்தை குறைத்திருக்கிறான், இறங்கிவிட்டார், அங்கிருந்து மெயின்ரோட்டுக்கு 2 மைல் இருக்கும் ஊருக்கு பஸ் ஏறனும்ன்னா மெயின் ரோட்டுக்குத்தான் போகனும் . கள்ளச்சாராய தடுப்பு பிரிவில் எஸ்.ஐயாக இருந்த போது இந்த பகுதி சாராய வியாபாரிகளை கடையோ கடையென கடைந்து வெண்ணை திரட்டியிருக்கிறார்

ரெய்டின் போது மாட்டிய வியாபாரிகளை ஊறல் பானையை தலையில் தூக்கி வைத்த படியே 8 மைல் இருக்கும் ஊரக காவல் நிலையத்திற்கு நடக்க வைத்தே அழைத்துச்செல்வார். ” என்னை அடிச்சுகூட கொன்னுக்கோ, பிட்டு நவர முடியாது”ன்னு யாகப்பன்பட்டி மேட்டில தலையில இருந்த பானையை டொப்ன்னு போட்டு உடைச்சிட்டு படுத்துகிட்ட சேவியரின் காதுல எதோ சொன்னார். அவன் சாவி கொடுத்த பொம்மையாட்டமா எந்திரிச்சு “அய்யா, சாமி சாமி அப்பிடி கிப்பிடி எதும் செஞ்சுடாதிங்கய்யா”ன்னு கையெடுத்து கும்பிட்டு உடைஞ்ச பானை ஓடுகளை பொறுக்கி தலையில் வச்சுகிட்டு மறுபடியும் ஸ்டேசன் இருந்த தெச பக்கம் நடக்க ஆரம்பிச்சான் .


சும்மா என்னேரமும் லத்தியெடுத்து சளார் சளார்ன்னு அடிச்சுகிட்டே இருந்தா காவாலி போலீசுன்னுதான் பேரு வாங்கனும். புத்தியையும் அப்பைக்கப்ப பயன்படுத்தலன்னாக்கும் மரியாதையில்லை. இப்ப பாருங்க சேவியரு காதில “நீ நல்ல சாதிமான் தானே, உன் கன்ணெதிரே உன் வூட்டுக்குள்ள சாராயம் இருக்கான்னு அந்தோணி போலீச விட்டு சர்ச்சிங் பண்ணவுடுவேன்”னு சொல்லவும் நடந்து செத்தாலும் பரவாயில்லைன்னு லொங்குடி லொங்குடின்னு சேவியர் போறதை.

அந்தோணி போலீஸ் என்பவரும் மனிதர்தான், அதிலும் அமைதியானவர். போலீஸ் என்றாலும் யாரையும் தேவையில்லாம அடித்து பார்த்ததில்லை, அதிகபட்சம் சத்தம் போடுவார் அவ்வளவே. அவர் சேவியருக்கு கீழான சாதி அதனாலாத்தான் கெரண்ட தொட்ட மாதிரி இம்புட்டு வெறப்பா போறான். ஆனா பத்து கி.மீ வழியிலிருக்கும் ஊர்களில் எல்லாம் அவன் டவுசருடன் வருவதையோ, ஒவ்வொரு கிராமத்திற்குள் நுழையும் போது லத்தியை சுழற்றி சுழற்றி பின்பக்கத்தில் ”இனிமே சாராயம் விப்பியா, விப்பியா “ என்ற கேள்வியோடு அடிவிழும் போதெல்லாம் “செய்யமாட்டேன்யா செய்யமாட்டேன்யா” என்றலருவதை ஊர் மக்கள் 
எல்லாம்வேடிக்கையாய் பார்ப்பது பற்றி துளியளவு எண்ணமில்லை, அவனைப் பொறுத்தவரை ஊரறிந்த அந்தோணி போலிஸு தான் வீட்டுக்குள்ள வரக்க்கூடாது.

போலீஸ் என்றால் இது போன்ற விஷயங்களில் கொஞ்சம் வஞ்சத்தோடு நடந்து கொள்ளவேண்டும். அவரை பொறுத்தவரைக்கும் சாதி ஒரு நல்ல ஏற்பாடு, கீழ இருப்பவனுக்கு அவனை மதிக்கிற மாதிரி ஆக்ட் கொடுக்கனும், மேலே இருப்பவனுக்கு லைட்டா பம்முற மாதிரி காட்டிகிட்டா போதும். ரெண்டு பயலும் சலாம் போடுவானுக. போலீசில் அப்படியல்ல மேல இருப்பவனுக்கு பம்மோ பம்முன்னு பம்மனும். கீழ இருக்கிறவன நாயினும் கீழ நடத்தனும்.

அன்னைக்கு அப்படித்தான் டிஎஸ்பி தோட்டத்துக்கு ஆட்டு புழுக்கை ரெண்டு லோடு அடிக்கனும்ன்னு சொல்லிருந்தாருன்னு ரெண்டெல்லைப்பாறை போயி ( போலீசில் இது போன்ற வேலையெல்லாம் சாதாரணம் – குண்டி மட்டும் கழுவிவிட சொல்லமாட்டாய்ங்க அந்தளவுக்கு சேமம் ) பேசி மாட்டு வண்டியேத்திவுட்டு வரும்போது பெனடிக்கும் சார்லியும் நடந்து வந்துகிட்டு இருந்தாய்ங்க.

இந்த பெனடிக்கிற்கும் சார்லிக்கும் பஞ்சமி ஜாரில கவர்மெண்ட் ஆளுக்கு முணு ஏக்கரா கொடுத்திருக்கு. அன்னைக்கு இத அளந்து கொடுத்த கணக்குப்புள்ளையும் சர்வேயரும் என்ன கணக்கில இந்த இடத்தை ஒதுக்குனாய்ங்களோ ரெண்டு பேரு இடமும் இப்படி குடியானவுக நிலத்துக்கு மத்தியில மாட்டிக்கிச்சு. அரசாங்கம் அவர்களுக்கு கொடுத்த இடத்துக்கு போறதே நரகல் மத்தியில பெருவிரல்களினால் கவனமா தாண்டித்தாண்டி நடந்து போற மாதிரி ஆகிப்போச்சு. நெரந்தர வெவசாயம் செய்யக்கூடாது, வெங்காயம், கடலைன்னு ஆசையா போட்டப்பலாம் விதைச்ச காட்டில மாடவுட்டு உழுதுப்புடுவாங்க. யாரு மேல பிராது சொல்லி என்ன பிரியோசனம். யாரு நல்லது கேக்கனுமோ அவருதான் செஞ்சிருப்பாரு.

ஞாயித்துகிழமை பூசை முடிச்சிட்டு போன சாமியாரு பின்னாடியே போய் ’அய்யா இப்படி அந்த சவரிமுத்து பெரியதனக்காரர் இப்படி பண்ணிட்டாக, கேட்டா இருநூறு குழி எனக்கு நெலம் இருக்கு நடுவுல என் கோவணத்து அளவுல வச்சிருந்தா யாருக்கு பிசாசே தெரியும், போ போயி ஓசியில கொடுத்த கவருமெண்டுகிட்டயே திருப்பி கொடு’ன்னு வெரட்டிவுட்டுடாருங்க என்று பிராது சொல்லிருக்கின்றனர்.

ரெண்டு பேரையும் உற்று பார்த்த சாமியார், ”பெனடிக்கு, குருமாரா படிச்சி வந்தோனே என்னை மொதல்ல அந்த பங்குகிற்குதான் பொறுப்பா போட்டாங்க. ஆர்ச் பிஷப் ஆபிஸுல யாரோ அந்த ஊருக்காரங்க இருப்பாங்க போல. அங்கேருந்து இங்க சொல்லி இந்த ஊருக்காரங்க லாரி புடிச்சு திருச்சிக்கே வந்து இந்த சாதிக்கார சாமியாரத்தவிர குடியான சாமியாருல யாரை வேணுமின்னாலும் போடுங்க இல்லைன்னா நாங்க மதம் மாறிடுவோம்ன்னு சத்தம் போட்டாங்க. அப்புறம்தான் இந்த பங்கிற்கு வந்தேன். அவங்களுக்கு சேசப்பன் இப்படி தாழ்வான சாதின்னு தெரிஞ்சா மறு நிமிசமே அவரை தூக்கி போட்டுருவாங்க. உங்களுக்காக அந்தோணியப்பனை வேண்டுறேன், அவரு நமக்காக கடவுள்கிட்ட துதிப்பாரு” என்று அனுப்பி வைத்தார்.


புல்லட்டை நிறுத்தி இருவரையும் விசாரித்தார். மலையடிவாரத்தில் இருக்கும் கொழும்புக்கார பாய் தென்னந்தோப்பில் தென்னைமரத்துக்கெல்லாம் பழுது நீக்கி எரு வைத்துவிட்டுருவதாக சொல்லவும். வண்டியில் ஏறச்சொல்லி ஸ்டேசனுக்கு அழைத்து வந்தார். வரும் வழியில் மேற்சொன்ன சுயபுராணத்தை கடற்கரையிடமும் சொன்னார்கள். “அய்யா எங்களுக்கு கொடுத்த இடத்தை விக்கவும் முடியாதாமுல்ல, நாய் தேங்கா வச்சுகிட்டு உருட்டினமாரி இன்னும் 30 வருசத்துக்கு ஒண்ணு செய்ய முடியாதமுல, உண்மைகங்களா “ என்றனர். ஸ்டேசனும் வந்துவிட்டது.

ஸ்டேஷன் பின்னாடி அஞ்சு ஆறு மரம் இருக்கு ஏறி பழுது பாத்துட்டு எதுத்த புளியமரத்து கடையில் ஸ்டேசனில் சொல்லிவிட்டதா சொல்லி இட்டிலி சாப்பிட்டு வந்து வாசலில் ஒக்காந்திருங்க “ என்று சொல்லிவிட்டு போய்விட்டார்.

திரும்பி வந்த கடற்கரை அவர்களை உள்ளே வரச்சொன்னார். வேறு வேலையாக என்றாலும் காவல் நிலையத்துக்குள் போகும் போது பெனடிக் சார்லி போன்ற அப்பாவிகளுக்கு தானக கைகள் மார்பின் குறுக்கே போய் முதுகு சற்று குனிந்து விடுவது அவருக்கு கொஞ்சம் சந்தோசமாக இருந்தது. ஏனென்றால் அவரின் மேலதிகாரியை பார்க்கப் போகும் அவரின் முதுகும் லேசாக கூன் விழுந்துவிடும். அங்கு அடிக்கும் சலாம்களை எல்லாம் இங்கு வந்து அவருக்கு கீழான நபர்களிட்ம் மீட்டெடுத்துக்கொள்வார்.

தரையைக்காட்டி இருவரையும் உக்காரச்சொன்னார். ”இங்க பாருங்க இப்ப ஒரு வெவரம் சொல்லுறேன் அதுபடி செய்யுங்க அப்பத்தான் உங்க நெலத்துக்கு போயி வெள்ளாமை வைக்கலாம், ஆனா என்னைய நம்பணும் என்னாங்கய்யா சொல்லுறீங்க”

சாமி, கடவுளாட்டம் நல்லது செய்யுறேங்கிறீங்க , இதுக்கும் கீழ என்ன கேவலப்பட்ட பொழப்புயா பொழச்சிட போறோம் சொல்லுங்க சாமீ “ என்றனர் இருவரும்

அந்தூரு பெரியதனம் சவரிமுத்து தோட்டத்தில கிழக்க இருக்கிற கேணிக்கு பக்கத்தில மிக்கெல்பாளையம் செபஸ்தியாரு ஊறலு போட்டிருக்கிறானாம். நான் ரெய்டுக்கு வருவேன் நீங்க உங்க நெலத்தில நில்லுங்க. ஊறலு எடுத்து அடுப்பு போட்டு வடிக்கிற வரைக்கும் எப்படியும் நோனி மகேன்ங்க யாரும் பக்கத்தில இருக்க போறதில்லை. உங்களை புடிச்சு ஊரில பாக்குற மாதிரி அடிச்சு இழுத்துகிட்டு வர்றேன்,” என்றார்.
சரிங்கய்யா ஜெயிலுக்கு ஏதும் அனுப்பிடாதீகய்யா, கண்ணு விடுக்காத பொட்டபுள்ள வச்சுருக்கேன் என்றான் சார்லி.

யோவ் ஒரு மாசம் உள்ள போகாம உங்க நெலத்துல நீங்க பீக்கூட பேலப்போவ முடியாது. சொல்லறத ஊளுன்னு கேளு இல்ல தலைக்கு ரெண்டு பிட்பாக்கெட் கேசு போட்டு இப்பவே ரிமாண்ட்டு அனு[ப்பிடுவேன்” கடற்கரை சட்டென்று போலீஸ்காரனாகினார் .

அய்யா அதுக்கு இல்லய்ங்கய்யா… என இழுத்தனர்.

நாஞ்சொன்னா நல்லதுக்குதான்யா சொல்லுவேன் – என்னைய யாருன்னு நெனச்ச என்ற படி சிகரெட்டுக்கு தீப்பெட்டி தேடி ரைட்டர் ரூமுக்கு போய்விட்டார்.

சார்லீ “யோவ் மாமா, அய்யா நம்மாளுகளா இருப்பாரா.. நமக்கு நல்லது யோசிக்கிறாரு” என்றான்

நேத்து முள்ளொடிக்க போறப்ப, வனத்து சின்னப்பருக்கு முழந்தாளில கோயில சுத்தி வந்து தென்னம்பிள்ளை வைக்கிறேன் என் நிலத்தில ஒரு நா ராத்திரி தூங்கினா போதும்ன்னு வேண்டினேன்” அவருதான் இவர அனுப்பிருக்காரு சின்னப்பரே தோத்திரமய்யா”என்றான் பெனடிக்.

நீராவி ரயிலிஞ்ஜின் மாதிரி முகம் எல்லாம் புகை கவிழ வந்தார் கடற்கரை.

நாளைக்கு 7 மணிக்கு வருவோம் நீங்க ரெண்டு பேரும் அங்க இருங்க புடிச்சாந்து கடுக்கா கேஸ் போட்டு உக்காரவைக்கிறேன். அப்புறம் பாரும் உங்க பிரச்சினை தன்னால முடிவுக்கு வரும் என்றார்.

கடுக்காய்ங்கிறது சாராய ஊறலுக்கு பட்டை, நாட்டு சர்க்கரை எவ்வளவு முக்கியமான பொருளோ அது போல இதுவும் . ஆனா கையளவு வச்சிருந்தா கேஸ் இல்லை மூட்டை கணக்கில வச்சிருந்தா வழக்கு போடலாம்.

சாமி, ஒரு வா ஒரே ஒரு வா என் நெலத்தில எடுத்த கம்புல கஞ்சி காய்ச்சி குடிச்சிட்டு செத்து போயிருனும் சாமி “ சார்லி தேம்பினான்.

அதுலையே போட்டு பொதைக்கிற மாதிரி வழி பண்ணுறேன் போயிட்டு வா” – சோகமான சினிமா பாட்டுக்கே கண்கலங்கிவிடும் கடற்கரையின் இயல்பை காவல்துறை வடித்து எடுத்திருந்தது

அவர்களுக்கு கையில் காசிருந்தாலும் நிலம் வாங்கும் உரிமையில்லை ஆயிரமாயிரம் வருடங்களாக. அதை அவனால் தெளிவாககூட சொல்ல முடியவில்லை. ஒரு நாளேனும் தனக்கு சொந்தமான நிலத்தை ஆண்டுவிட்டு செத்துவிட ஏங்கும் ஆயிரமாண்டு ஏக்கம். கடற்கரையால் புரிந்துகொள்ள முடிகிறது, ஆனால் அதிலேயே நெகிழ்ந்துவிடக்கூடாது என்பதற்காக வறட்டு கேலி பேசி அடுத்த பேச்சுக்கு போய்விடுவார்.

ஆடு மாடு உள்ளே வராமல் இருக்கு தடுப்பிற்காக பாண்டியாட்டம் போல இங்கிட்டும் அங்கிட்டுமாய் மாற்றி மாற்றி ஊன்றப்பட்டிருந்த தண்டவாளங்கள் துண்டுகளை தாண்டி ஸ்டேசனை விட்டு வெளியே வந்தார்

வெளியே ஓலைக்கொட்டாய்யில் சின்ன காபிக்கடை. காபி குடிக்ககெனும்ன்னா குத்தவச்சுத்தான் குடிக்கமுடியும் அவ்வளவு தாழ்வா இருந்தது.சாணி மொழுகிய தரை. அதும் கடற்கரை 6 அடி ரொம்ப சிரமப்பட்டு குனிந்து யாருய்யா கடையில என்று சத்தமிட்டார்.
வெளிய வந்த பெண்மணி கடற்கரையை அடையாளம் கண்டுவிட்டாள்

சேசுவே.. மொதலாளில்ல வந்திருக்காரு” என்றபடி கும்பிட்டவாரே பத்தடி தள்ளி நின்றாள்.

இவருக்கு ஒன்னும் தட்டுபடலை அவள் யாரென்று. உம் புருசனை கூப்பிடும்மா என்றார்.

மாட்டுக்கு புல்லறுக்க போயிருக்கு, இருங்கெ மகனை தாட்டிவுடுறேன் என்று 7 வயது பயலிடம் சொல்லி அனுப்பினாள்.

நீ யாரும்மா, என்னை தெரியுமா

மொதலாளி ஒங்களாலதான் நல்ல கஞ்சி குடிக்கிறோம். எங்க நெலத்தக்குள்ள கொண்டு போய் ஒக்கார வச்சிகளே சாமி “

பெனடிக் பொண்டாட்டியா ?

அய்ய இல்லீங்க சார்லி சம்சாரங்க..

சார்லி வந்து சேர்ந்தான். வெள்ளைச் சட்டை கைலி கையில டீவி மோதிரம். ம்ம்ம் லேசா மஞ்சக்கொழுப்பு பாலாடை போல இப்பத்தான் அவனுக்கு கட்ட ஆரம்பிச்சிருக்கு என்று நெனைத்துக்கொண்டார்.

இந்த சுதந்திரம் கொடுப்பவர்களுக்கு அதை பெறுபவர்களின் கண்களுக்கு தெரியாமல் ஒரு எல்லையொன்றை வகுத்திருப்பார்கள். அதை சுதந்திரம் பெற்றவர்கள் தாண்டுவதாக தெரிந்தால் அவர்களின் சுதந்திரத்துக்கு முதல் எதிரியாக அவர்கள்தான் மாறுவார்கள். சார்லியின் கூன் கொஞ்சம் நிமிர்ந்திருப்பதாக பட்டவுடன் ”எலே, தாய்லீ உனக்கு வந்த வாழ்வா, கையில மோதிரம் தோளில துண்டா” மனசுக்குள் கருவினார் கடற்கரை. 

டேய் ஊருல டிவிஎஸ் 50 வண்டி எவனும் வச்சிருந்தா எடுத்கிட்டு வரச்சொல்லு டவுணில என்னை இறக்கிவுடனும் என்றார்.

அதுக்கு ஊருகுள்ள எதுக்கு சாமி போகனும் என்கிட்டவே லூனா இருக்கு.பின்னாடி நிக்குது எடுத்தாரேன். நீங்க ஓட்டுங்க சாமி நான் பின்னால உக்காந்து வாரேன்.

உக்காரும் இடத்தில் மொளகாய அரச்சு அப்புன மாதிரி இருந்தது கடற்கரை இன்ஸ்பெக்டருக்கு. 



( தொடரும் )

Thursday, March 27, 2014

@ 6:10 PM எழுதியவர்: வரவனையான் 3 மறுமொழிகள்

( மார்ச் 26 -2014 தேதி இரவு எழுதத்துவங்கினேன் இந்த நாவலை இங்கு அதன் RAW வெர்சன் புத்தகமாக வரும் வரை வெளியிடுவேன் )




                                            பைசாசன்                               


அத்தியாயம் 1









அந்த காவல் நிலையம் நகரத்தின் மையத்திலிருந்தது. மையத்தில் இருந்தாலும் அது வடக்கு காவல் நிலையம் என்றே அழைக்கப்பட்டது. அது போலவே மேற்கு காவல் நிலையம் வடக்கிலும், தெற்கு காவல் நிலையம் மேற்கிலும் இருந்தது. அவை திசை மாறியிருந்தாலும் அவையின் சட்ட வரம்பிற்காக அப்படி குறிப்பிடப்பட்டிருந்தது

பெருங்கிராமமாக இருந்து நகரமாக அவ்வூர் மாறி 30 ஆண்டுகள்தான் ஆகியிருந்தால் பெரு நகரத்திற்குரிய கூறுகளும் இல்லை அது போல ஒரு பேரூராட்சியின் பரப்பை போல் அரைமணியில் முழு ஊரையும் வெறும் கால்களில் அளந்துவிடுமளவிற்கு சிறியதாகவும் இல்லை.

சின்ன வியப்பென்னவென்றால் கிழக்கு காவல் நிலையம் ஊரின் கிழக்கிலேயே இருந்ததுதான். இதில் ஒவ்வொரு நிலையத்திற்கும் ஒரு குணமிருந்தது. வடக்கு நிலையத்திற்கான சட்ட எல்லைகள் முழுவதும் நகரத்திற்குள்ளே வரும்,அதனால் அது சட்ட ஒழுங்கை பாதுகாக்கவும்,அதனை கண்காணிக்கவும், நிறைந்திருக்கும் அரசு அலுவலகங்களின் அதிகாரிகளோடு இணைந்து செயல்படும் குணயியல்பு கொண்ட காவலர்களால் நிறையப் பெற்றிருந்தது. மேற்கு நிலையத்தில்தான் நகர திருட்டு தடுப்பு பிரிவு இருந்தது. காணும் யாரையும் ஏன் சமயங்களில் தன்னைக்கூட சந்தேகப்பார்வையுடன் பார்க்கும் காவலர்களும், குற்றவாளிகளை கொடூரமாக வதைத்து எத்தகைய உண்மைகளையும் வாங்கிவிடும் திறன் படைத்த காவலர்களும் கொண்டது

சமயங்களில் அந்த சரகத்தின் எல்லைக்குட்பட்டு ரவுடித்தனம் செய்யும் சட்டமீறீகள் கொடுங்காவலர்களால் வெகுவாககவனிக்கப்பட்டுதானாக முன்வந்து ரௌடித்தொழிலிருந்து குறைந்தது சில வருடங்களாவது விலகியிருக்க நேரிடும். இதனால் மேற்கின் எல்லையில் சட்ட ஒழுங்கெல்லாம் மீறப்படும் சாகச வேலைகள் ஏதும் இருக்காது.


தெற்கு நிலையமோ இவையிரண்டுடன் ஒப்பிட முடியாத அளவுடன் வித்தியாசமாய் சவசவ என என்னேரமும் திருவிழாக்கூட்டமாய் இருக்கும். அந்த நகரத்திற்கு அடிமட்ட வேலைகள் செய்யும் ஒடுக்கப்பட்ட மக்கள் வசிக்கும் கிராமம் ஒன்றும், அந்நகரத்தின் கூலித்தொழிலாளர்கள் நிறைந்த மிகவும் பிற்படுத்தபட்ட மக்களால் (இரண்டு சமூக மக்களும் தங்களை ஆண்ட பரம்பரை என்றே சொல்லிக்கொள்கிறனர், அதற்காக வரலாற்றிலிருந்து சில மன்னர்களின் பெயர்களையும் எடுத்து வந்திருக்கின்றனர் ) நிரம்பபெற்ற ஒரு கிராமமும் இருந்தது.

அந்த இரண்டு கிராமத்தை மேய்ப்பதே தெற்கு கச்சேரிக்கு முழு நேர வேலையாக இருந்தது. சொல்ல மறந்துவிட்டேன், நகர மக்கள் காவல் நிலையம் என்று சொல்வதில்லைகச்சேரிஎன்றே சொல்வார்கள். இரவுகளில் நடக்கும் விசாரணைகளின் போது கேட்கும் அலறல் சத்தத்தினால் அப்படி அழைக்கப்பட்டது. காலையில் நொண்டியடித்துக்கொண்டு கைவிலங்கொடு கோர்ட்டு ஏட்டய்யாவினால் சைக்கிளில் ஏற்றி நீதிமன்றன்றத்திற்கு அழைத்து செல்லப்படுபவரே இரவில் கச்சேரியில் பாடியவித்துவான்என்று அருகில் உள்ளோர் அறிந்து கொள்வார்கள். கிழக்கு கச்சேரி பற்றி கொஞ்ச நேரம் கழித்து பாப்போம் முதலில் வடக்கு கச்சேரியின் இந்த கோடைக்கால காலையில் என்ன நடக்குதென பார்ப்போம்.

வடக்கிலிருந்து வந்து போல கிழக்கினை நோக்கி திரும்பும் இடத்தில் தெற்கு பார்த்திருந்து வடக்கு கச்சேரி.

யோவ் , பாரா பாக்குற மம்புட்டி, இங்க வாயாஎன்றபடி புல்லட்டிலிருந்து இறங்கி வந்தார் கடற்கரை செல்வம். அவர்தான் சர்க்கிள் இன்ஸ்பெக்டர். பைசாவெல்லாம் வாங்கமாட்டார். மேற்கு கச்சேரியிலிருந்தவரை இங்கு மாற்றி ஒரு வாரம் பத்துநாளே ஆகியிருந்தது. அவருக்கும் இங்கு வரவெல்லாம் இஸ்டமில்லை. ஒரு மாதம் முன்பு புதியதாக கம்ப்யூட்டர் இஞ்சினியரிங் என்று எதோ படிப்பு மெட்ராஸில் வந்திருக்கிறது அதில்தான் படிப்பேன் என்று மகன் ஒற்றைக்காலில் நிற்கவும் அவனை அழைத்துக்கொண்டு சென்னைக்கு விடுமுறையில் போயிருந்தார்.


அந்நேரம் பூட்டிய மில்லில் திருடியதாக வெங்கலப்புடுக்கு என்கிற கந்தவேலுவை விசாரணைக்கு கச்சேரிக்கு அழைத்து போயிருக்கின்றனர். போன இடத்தில் ’மானம் வரின் உயிரை மயிராய் நினைத்து உதிர்த்துவிடும்’ குலக்கொழுந்தான பிரபலஅபேஸ் மன்னன்வெங்கலப்புடுக்கு அலைஸ் கந்தவேலு அருணாகயித்தால் லாக்கப் கம்பிக்குள் நின்று கொண்டே நாண்டுவிட்டான். இப்படி சுலபமான வழிகளை ஜாப்பானிய ராணுவத்தினருக்கு வெங்கலப்புடுக்கின் மூதாதையர்களான இரும்பாலனதோ அல்லது அதற்கு முந்தைய கற்புடுக்கோ கற்றுக் கொடுத்திருந்தால் உலகப்போரின் போது களத்தில் தோல்வி சூழும் போது கைதாக விரும்பாமல் தொப்புளுக்கு கீழான இரண்டாவது இஞ்சில் கத்தியை சொருகி கடும் வலியுடன் தற்கொலை கொண்டிருக்கமாட்டார்கள்.

கடற்கரைசெல்வம் மெட்ராஸிலிருந்து பொலபொலவென விடியும் போதும் பாண்டியனில் இருந்து இறங்கினார். நாளிதழ்களில் கொட்டை எழுத்துகளில் கச்சேரியில் எழவு விழுந்திருந்த செய்தி வந்திருந்தது. செய்தாள்களின் போஸ்டர் பார்த்தவுடன் இறங்கிய ரயிலில் ஏறிக்கொண்டார். மகனிடம் ”வீட்டிற்கு யார் வந்தாலும் அப்பா 10 நாள் லீவு இருந்தாலும் லாக்-அப் டெத் விஷயமாகத்தான் மருதைக்கு எஸ்பி அய்யாவை பார்க்க போயிருக்கிறார் என்று சொல் என்று அனுப்பி வைத்தார்

அதே டிரையினில் திடுதிடுவென்று ஓடி வந்து அவரின் ஸ்டேசனில் வேலை பார்க்கும். பிச்சைமுத்து இரண்டு பைகளுடன் ஏறினார். கடற்கரையை பார்க்கவும் ரயிலின் மரத்திலான தரை அதிர கப்பார் என்று ஒரு சல்யூட்டடித்தார்.

அய்யா, இப்போத்தான் வர்றீகளா, பெரிசா ஆகிப்போச்சுங்கய்யாஎன்றார்.
என்னத்த எளவுகூட்டித் தொலஞ்சிங்கஎன்றார் இன்ஸ்பெக்டர்.

அந்த சிந்தலக்குண்டுக்காரி மவேன் கந்தவேலு இருக்கான்லையா,. மூடிக்கிடந்த வாளி கம்பேனிக்குள்ள குதிச்சு தேட்டைவுட்டுருக்கான், சேர்மன்நகர் குப்பைக்கடையில திருட்டிரும்பை எடை போட்டுகிட்டு இருக்கும் போது பெரியாம்பிளை ஏட்டய்யா எதார்த்தமா போனவரு புடிச்சாந்திந்திருக்கார்என்றபோது ரயில் விசில் அலறியது. இஞ்சினுக்கு இரண்டாவது பெட்டி என்பதால் கரும்புகையடித்தடித்து எதோ பாண்டியன் விரைவு ரயிலின் நீராவி இஞ்சினை விடியவிடிய கரியள்ளி நெருப்பில் போட்டு மெட்ராஸிலிருந்து கடற்கரைதான் ஓட்டி வந்தது போலிருந்தார். அவரின் முகம் பார்த்து பிச்சைமுத்துக்கு கொஞ்சம் மகிழ்ச்சி. ’புதைத்து புடுங்கிய பொணம்என்கிற உதாரணம் அவரின் மனதில் வந்தது.

இஞ்சின் ஓட்டுறவன் பொண்டாட்டிக்கி சொல்லுறான் போல பொச்ச கழுவி வய்யின்னு,... மருதைக்கே கேக்கும் இவன் அடிக்கிற விசிலுஎன்று ரயிலின் நீண்ட விசிலுக்கு அலுத்துக்கொண்டார் கடற்கரை.

சொல்லுய்யா அவன் அடிச்சா அடிக்கட்டும் என்றார் ஏட்டை பார்த்து.

பெரியாம்பிள்ளையும் நேரு போலீஸும் விசாரிக்கட்டும்னு சின்னய்யா சொன்னாருங்க

யோவ் கையில பொருளோட மாட்டினதுக்கப்புறம் என்ன மயிரை அவன்கிட்ட விசாரிக்கிறீங்க, நாலு நாளு ஆள் இல்லைன்னா பூராத்தையும் நீங்களே நறுவிசா நக்கனும்ன்னு நெனைப்பிங்ளே

அய்யா, .எஸ்பி பொண்ணோட மாமனாரும் அத்தையும் பழநி கோயிலுக்கு கூட்டி போகச்சொல்லி போன் வந்து நான் போய்ட்டேங்கய்யா

வழக்கமா இந்த பண்டார வேலையெல்லாம் நார்த் போலீசுதானே பாப்பாங்க, நீ ஏதும் முருகனுக்கு வேண்டுதல் வச்சிருந்தியா

இல்லங்கய்யா, வடக்கு சரகத்தில கம்யூனிஸ்ட் மாநாடாம், அதான் ஸ்ட்ரெந்த் பத்தலைன்னு, நம்ம ஸ்டேசனுல இருந்து போக சொல்லிட்டாங்க, அப்புறங்கய்யா, ராத்திரி இஞ்சி விக்கிற கதிரேசனுகிட்ட ஒரு பவுண்ட் எடுத்தாந்து சர்பத் கிளாசுல பாதி ஊத்தி அதுல முட்டை உடைச்சி ஊத்தினாரு பெரியாம்பளை, அப்படியோ இட்லி கணக்கா முட்ட பொரிஞ்சிடுச்சு

சரிதான், போதையில் அடிச்சே கொன்னுட்டானா அந்தாளுஅந்த அவுசாரி மகனெ இஞ்சி விக்கவுடாதீங்கய்யான்னு சொன்னேன், இப்படியாவும்ன்னு அப்பவே தோணுச்சி, ம்ம்.. சொல்லு

அய்யா அந்த வாளி கம்பேனிக்காரரு வந்து இதுவரைக்கும் 400 கிலோ காணோம் நல்லா விசாரிங்கன்னு சின்னய்யாகிட்ட சொல்லிட்டு அவரு வீட்டுக்கு நாலு வாளியும் ரெண்டு சேவலும் கொடுத்துவிட்டாராம்.’ சின்னய்யாவும் அதான் கொஞ்சம் விசாரிங்கன்னு சொல்லிட்டு போனாரு

அந்தாளே சீட்டிங்சேலத்துல மஞ்ச நோட்டிஸுட்டுட்டு அந்த காச இங்க போட்டு மச்சினன் பேரில கம்பேனி நடத்துறான்

அய்யா, ஏற்கனவே லாக்கப்பில லாரி பேட்டையில ஜாக்கி லவட்டின செல்வம்ன்ற கிளினர் இருந்திருக்கிறான், பெரியாம்பளை வெங்கலப்புடுக்கை அடிஅடின்னு அடிச்சி விசாரிச்சிருக்காருஅவன் சாமி சத்தியமா இல்லைன்னு சொல்லியும் கேக்கலையாம். அப்புறமா ரொம்ப அக்கிரமம் பண்ணிருக்காருங்கய்யாஅந்த செல்வத்த அடிச்சி இவனுத புடிச்சி வாயில வைக்க சொல்லிருக்காரு

யாரு பெரியாம்பிளை வாயிலையா

இல்லங்கய்யா, வெங்கலப்கந்தவேலோட அத எடுத்து செல்வம் வாயில வச்சு எதோ செய்யசொல்லிருக்காருய்யா

அதுக்கு செல்வம் உம் பொண்டாட்டிய கூட்டியா அங்க வைக்கிறேன்னு சொன்னான் போலாங்கையா

இந்தாளு உங்களுது மாதிரி பெரிய லத்தி எடுத்து செல்வத்தை அடிக்கப் போக அடியப்பூராம் குறுக்கால விழுந்து கந்தவேலு வாங்கினதுல தலை பொளந்துகிச்சுங்கய்யா ! விடிய வரைக்கும் செல்வம் கத்தியிருகான் யாராவது வாங்கண்டுகச்சேரி சத்தம்ங்கிறாதால யாரும் கண்டுக்கலைய்யா. ரத்தம் நிக்காம போயி செத்துட்டான், நேரு ஏட்டய்யா காலையில ரோல்காலுக்கு வந்து பாத்தவரு பதறிப்போய்ட்டாராம். அந்நேரம் ஸ்டேசனை கூட்டி வாசத்தொளிக்கநெளிசல்வந்திருக்கான் அவனைக் வச்சு பாடியை அண்ணாகயித்த கழுத்துல மாட்டி நிப்பாட்டியிருக்காங்க

ஃபாரசின்க் போட்டோக்காரரு திருமாறனும், தினமுரசு போட்டோகாரரும் வந்து படம் புடிச்சிட்டு போயிட்டாங்களாம் மித்த யாருக்கும் தெரியாம கணக்குபிள்ளைய கூட்டியாந்து காட்டி அவரு போயி தாசில்தாரையும் சரி பண்ணி நேரில கையெழுத்து வாங்கியாச்சு, பின்ன சூசைட்டுன்னு எப்..ஆரும் போட்டாச்சு. அதுவரைக்கும் எல்லாம் சரியாத்தாங்கய்யா போயிட்டிருந்துச்சாம், போட்டோ எடுகிட்டிருந்த நேரத்தில அந்த செல்வம் பய லைன்வுட்டுட்டான். ஒடீன தாயோளி கம்யூனிஸ்டுக கூட்டதுல போய் சொல்லிட்டான்.

கட்டழகு மாமா பொட்டழகு பூமா.. விட்டுபுட்டு ஓடாதே வெட்கங்கெட்ட டோமா வெட்கங்கெட்ட டோமா வெட்கங்கெட்ட டோமாபேட்டரிக் கட்டை ரேடியோவின் பாடல் இலங்கை ஒலிபரப்புக்கூட்டுஸ்தாபனதிலிருந்து ரயிலொசையுடன் சரிக்கு சரியாய் மல்லுக்கு நின்றுகொண்டிருந்தது.

கடற்கரை செல்வத்துக்கு அதன் பின் என்ன நடந்திருக்கும் என்று முழுவதும் தெளிவாய் ஆரம்பித்தது. போன மாதம் இதே கம்யூனிஸ்டுகள் அவரின் மேற்கு சரகத்தில்தான் மாநாடு நடத்த அனுமதி கேட்டு வந்தார்கள். இவர் காளியம்மன் கோயிலுக்கு மலைக்கொழுந்தாபிள்ளை மண்டகப்படி நடத்துவதால் அனுமதி மறுக்கப்படுகிறது என்று மறுத்து அனுப்பிவிட்டார். அந்த காளியம்மன் கோயில் எளிய சாதியினர் கும்பிடுவது அதுக்குள்ளேகூட பெரிய சாதிக்காரர்கள் போகமாட்டார்கள் பின்னர் எப்படி மலைக்கொழுந்தாபிள்ளை மண்டகப்படி நடத்துவார் என்று கம்யூனிஸ்ட்கள் எதிர் குரல் எழுப்பினர்.

இதான்யா, ஊருக்குள்ள ஒரு நல்லதும் நடந்துறக்கூடாது. எவனும் ஒண்ணு சேர்ந்துடக்கூடாது. உங்களுக்கு பொசுப்பொசுன்னு ஆயிடும். சும்மாவா ஊரே உங்கள கொக்கி பார்ட்டின்னு சொல்றாய்ங்கஎன்று ஆட்காட்டி விரலை தூண்டில் முள் போல் வளைத்துக்காட்டினார் கடற்கரை.

இந்த கஞ்சிக்கு செத்த கம்யூனிஸ்ட்கள் நார்த் இன்ஸ்பெக்டர் திருமலைசாமியிடம் கெஞ்சிக்கூத்தாடி அவன் சரகத்தில அனுமதி வாங்கிருப்பானுங்க. இவனுங்க கெஞ்சவே வேணாம் அவனே இளிச்சவாயந்தான், ஆனா பெரிய ஓழன் . நல்லா துட்டு வாங்குறான் பொண்டாட்டிய அன்னைக்கு மாரியம்மன் கோயிலுக்கு புது லாம்பி ஸ்கூட்டரில கூட்டியாந்திருந்தான். நாம வெறும் வீராப்பு காட்டி டீசல் புல்லட்டை வச்சுகிட்டு லோலடிக்கிறோம். கூடிய சீக்கிரம் ஓதமே விழுந்துடும் இந்த டீசல் புல்லட்டை ஸ்டார்ட் செஞ்சு செஞ்சு என்றும் நினைத்துக்கொண்டார்.

சரித்தான் எப்படான்னு காத்திருந்திருந்திருப்பாய்ங்க வகையாக இந்த விஷயம் மாட்டவும் வஞ்சம் தீர்த்துகிட்டாய்ங்க என்று முடிவு கண்டவர் அப்புறம் என்னய்யா ஆச்சு என்றார் பிச்சைமுத்தை பார்த்து.

'மாநாட்டிலிருந்த அம்பூட்டு பேரும் ஸ்டேசன் வாசலில வந்து நீதி கேக்குறோம்ன்னு ஒக்காந்துட்டாங்க பெரிய அய்யாக்கும் அவங்களே தந்தியடிக்கவும் அவரும் வந்துட்டாரு என்னையும் தவிர ஸ்டேசனில எல்லாரையும் சஸ்பெண்ட் பண்ணிட்டாரு. பெரியாம்பிளைய கிழக்கு ஸ்டேசனில ஒக்காரவச்சிருக்காங்க உடனே போஸ்ட்மார்ட்டம் பண்ண பெரிய டாக்டருட்டையும் சொல்லிட்டு போயிட்டார். பிஎம் ரிப்போர்ட் பாத்துட்டு சொல்றேன் பெரியாம்பிளை மேல எப்..ஆர் போடுறதா வேணாமாம்ன்னு போகும் போது சொல்லிருக்காரு. அந்த இந்தான்னு பாடியை கோயிந்தாபுரம் சுடுகாட்டுலேயே எரிச்சாச்சுங்கய்யா' என்று முடித்தார்.

12 கேஸு இருக்கு அதும் போக எந்த வாய்தாவுக்கும் போகாம அதுலாம் ஒரு தனி கேஸாகி பிடிவாரண்டே அஞ்சாறு இருக்கும் அந்த திருட்டு்த்தேமகனுக்கு

எதோ நடந்தது நடந்து போச்சு அப்பாவி சப்பாவிக்கு இப்படியாச்சுன்னா சரி நியாயம் கேளு ரைட்டு. இப்படியாளுக்கு வக்காலத்துக்கு வர ஆளுகளை பாரேன்ன்னு கோவம் கோவமாய் வந்தது.

கையில என்னய்யா பெரிய பைஎன்றார் ஏட்டை பார்த்து.

நம்ம வெங்கலப்புடுக்குதாங்கய்யா

என்ன அஸ்திய ராமேஸ்வரம் கொண்டு போறீயா

இல்லங்கய்ய அவனோட கொடலு குந்தாணியெல்லாம் ஜாடியில போட்டு கொடுத்துருக்காய்ங்க விஸ்ராவிற்கு

விஸ்ரா என்றால் இறந்தவனின் உள்ளுறுப்பு சோதனை.போலீசு வேலைன்னா சும்மாயில்ல, இந்த சம்பளத்துக்கு, தண்ணியில ஊறிப்போன பொணத்தை எங்கிட்டும் தூக்கிட்டு அலையமுடியாதுன்னு கேணியில கம்மாயில ஊருணியில எதுல மிதக்குதோ அந்த கரையிலையே வச்சு அறுத்து பரிசோதனை பண்ணுவாய்ங்க கூட நிக்கனும். அறுக்குற டாக்டர் ஈரல் அளவுலாம் எடுக்கும் போது குறிச்சுக்கணும். அந்த உப்புன வயித்தை அறுக்கும்போது டொப்புன்னு சத்தத்தோட வயிறு பொளக்கும் போது வீசுமே ஒரு வாடை. இந்த பொழப்புக்கு நாலு பேர புடிச்சுன்னு ஒரு என்ணம் வரும். இதுவுமில்லாம மெயின் ரோட்டில எதும் ஆக்ஸிடெண்ட்ன்னா ஸ்பாட்க்கு போய் வெள்ளைவேட்டி எவன் கிட்டவாச்சும் கெஞ்சிக்கெதறி வாங்கி பாடிய மூடனும். பொம்பளை கிம்பளை எவளாவது அடிப்பட்டிருந்தா அவ நகை நட்ட காப்பாத்தனும். சமணமும் பௌத்தமும் போட்டி போட்டு வளந்த மன்ணில்லையா சங்கடமே படாம காதை மூக்கையெல்லாம் சரட்ன்னு அறுத்து பொட்டு தங்கத்தையும் குசுவிவிட்டு போயிருவானுங்க. தைப்பூசத்துக்கு மாலை போட்டிருக்கும் போலீசை தூக்கு போட்ட பையன் பாடிய இறக்க சொல்லுவாங்க. அந்த எரும மொட்டைகுண்டியாவா தொங்கணும், அவன் அப்படி தொங்கினானா இல்லை கால் உதறனுதுல கைலி அவுந்து விழுந்துச்சான்னு தெரியலை. கழுத்து இறுகி பீயெல்லாம் தள்ளி விந்து எதுக்க இருந்த சொவத்துல சொத்துன்னு அடிக்க செத்துபோயிருக்கிறான். எட்டடிக்கு எதுக்க இருந்த சொவருல அடிக்கிற வீரியம். மவராசன் உயிரோடு இருந்திருந்தா ஒரு போடுல புள்ள பெத்துருப்பான் என்று நொந்தபடி அந்த தற்கொலைக்காட்சியை குறிப்பெடுத்துக்கொண்டிருக்கும் போலிசிடம் கருணையை எதிர்பார்க்கும் முட்டாள்தனத்தை பழநி முருகன் கூட செய்யமாட்டான். இதுல நீதியாம் சஸ்பெண்டாம்.

வெள்ளோடு ஸ்டேசன் வந்தது. ஏட்டய்யாவையோவ் நான் ஊருக்கே போறேன் நீ மருதைக்கு போனாமா டெஸ்ட்க்கு கொடுத்தமான்னு வந்திருய்யா, சிடிசினிமாக்கு அம்மணப் படம் பாக்க போயிறாத, சாயந்திரம் வேலையிருக்குஎன்று மதுரை போக சொல்லி விட்டு இறங்கியவரிடம் பிச்சைமுத்து 

அய்யா, உங்களை பெரியய்யா வடக்கு நிலையத்துக்கு மாத்திட்டாங்கஎன்றார்.


(கட்டாயம் தொடரும் :)   )